Ἀπολυτίκιον. Ἦχος δ'.
Σήμερον τῆς ἀτεκνίας δεσμά διαλύονται·
τοῦ Ἰωακεὶμ γὰρ καὶ τῆς Ἄννης, εἰσακούων Θεός,
παρ' ἐλπίδα τεκεῖν αὐτούς, σαφῶς ὑπισχνεῖται Θεόπαιδα,
ἐξ ἧς αὐτὸς ἐτέχθη ὁ ἀπερίγραπτος, βροτός γεγονώς,
δι' Ἀγγέλου κελεύσας βοῆσαι αὐτῇ·
χαῖρε Κεχαριτωμένη, ὁ Κύριος μετὰ σοῦ.
Ἕτερον. Ἦχος α'.
Βουλῇ τῇ θεϊκῇ, ἡ θεόκλητος Ἄννα,
δεσμῶν στειρωτικῶν, λυτρωθεῖσα ἐν γήρᾳ,
ἀξίως συνέλαβε, τὴν τὸν Λόγον κυήσασαν·
ἣν θεώμενος, Ἰωακείμ ὁ θεόφρων, ἀνεβόησε·
Τὶς ἀνυμνήσει Οἰκτίρμον, βυθὸν τῆς προνοίας σου;
Κοντάκιον. Ἦχος δ'. Ἐπεφάνης σήμερον.
Ἐορτάζει σήμερον ἡ οἰκουμένη,
τὴν τῆς Ἄννης σύλληψιν, γεγενημένην ἐκ Θεοῦ·
καὶ γὰρ αὐτὴ ἀπεκύησε,
τὴν ὑπὲρ λόγον τὸν Λόγον κυήσασαν.
Ἕτερον. Ἦχος πλ. δ'. Τῇ ὑπερμάχῳ.
Τὴν θεοχάλκευτον λυχνίαν καί ἑπτάφωτον
Τῇ θεϊκῇ ἐπαγγελίᾳ ἐκομίσασθε
Ἰωακείμ τε καὶ Ἄννα μετ' εὐφροσύνης.
Ἀλλ' ὡς θεῖοι τοῦ Παντάνακτος Προπάτορες
Ἀπὸ πάσης ἡμᾶς ῥύσασθε κακώσεως
Τούς κραυγάζοντας, χαίροις ζεῦγος θεόλεκτον.
Μεγαλυνάριον.
Σήμερον ἡ Ἄννα ἡ εὐκλεής,
φύσεως τοῖς νόμοις, συλλαμβάνει θείᾳ βουλῇ,
τὴν τὸν Θεὸν Λόγον, ὑπερφυῶς τεκοῦσαν·
τὴν σύλληψιν οὖν ταύτης φαιδρῶς αἰνέσωμεν.
Γεράσιμος Μοναχός Μικραγιαννανίτης
Ὑμνογράφος τῆς Μεγάλης τοῦ Χριστοῦ Ἐκκλησίας
Πηγή: Νέος Ἑνιαύσιος Στέφανος,Γερασίμου Μοναχού Μικραγιαννανίτου, σελ. 146.
Δεν υπάρχουν σχόλια:
Δημοσίευση σχολίου